चिमणा...!

एके सकाळी एक चिमणा

माझ्या खिडकीत येवून बसला...

मला कळेना, यांत

माणसांत नसलेला जिव्हाळा कसला...! 

सोबती...!

चंद्र चांदण्यांचा सोबती

की रात्र चंद्राबरोबर

कोण झुरतं कुणासाठी

कळत नाही खरोखर...!

काळजी...!

आयुष्य थांबले जरा

थकल्या मना देण्या आराम

लोकांना काळजी इतकी

म्हणे हा अर्ध की पूर्णविराम...!

असाध्य...!

दांभिक सौजन्य अन

स्वाभिमानी बेपर्वाई

काय भोगावे काय त्यागावे

असाध्य नेमस्त चतुराई...!

निर्वेध...!

स्वत:ला अव्यवहारी ठरू देण

निर्मम-निर्वेध अन रास्त

स्वकष्टार्जित अपयश

पोकळ यशापेक्षा दुरापास्त...!

सवय...!

तुझी मला अलीकडे

इतकी सवय झालीय

मोगरा दरवळला तरी

वाटत तूच आलीय...!

धुमारा...!

उपचारांच्या भाऊगर्दीत

जाणीवेचा कोंडमारा

प्रच्छन्न भावनेला

उपेक्षेचा धुमारा...!

खंत...!

सृजनाची उर्मी की

निर्वाहाची भ्रांत

संदिग्ध अभिनिवेशात

निर्माणाची खंत...!

विसर्जन...!?!

यान्तु देवगणा: सर्वे पूजामादाय पार्थिवीम I

इष्टकामप्रसिध्यर्थम पुनरागमनाय च  II

ॐ तत्सद ब्रम्हार्पणमस्तु  I

मुर्दाड...!

भ्याड शासकांचे मुर्दाड सरकार

सर्वत्र रास छिन्न शरीरांची

हतबल रक्षक आणि गाफील मने

राजद्वारी तोरणे षंढ लक्तरांची...!

चर्चा..!

सुष्टांच्या दुष्ट प्रथा अन

त्रस्तांच्या खिन्न व्यथा

स्वप्रकाशाचा दीप पेटू दे

चर्चा तमाच्या यथा-तथा..!

चाहूल...!

कधी दुर्गा कधी गौरी

रूपे लोभस तिची सारी

माहेराला आल्या लक्ष्मीची

चाहूल तोरण  दारी...!

दांभिक...!

दांभिकपणा गर्दभांचा हल्ली

नेमका किती वाढलाय...

नारायण आणखीन हरी

कधीचा वेशीबाहेर अडलाय...!

यादी...!

तू मला ओळखतेस म्हणून

वाट पाहण सोडत नाहीस...

मला आणि काही नको

मी कुठल्याच यादीत मोडत नाही...!

ओम...!?!

अकार चरण युगुल I उकार उदर विशाल I

मकर महामंडल मस्तकाकारे I

हे तिन्ही एकवटले तेथ शब्दब्रह्म कवळले

ते मियां गुरुकृपा नमिले आदिबीज...I