अंतर...!

जीवन आणी मृत्यूत

तस फारसं अंतर नसतं...

दरम्यान जे जे घडतं

ते फक्त जर-तर असतं...!

उपचार...!

प्रश्न करणं हा कळवळा नाही

शिष्टाचार आहे...

उत्तर शोधणं ही इच्छा नाही

उपचार आहे...!

पोरकं...!

अनुभवच फक्त शिकवतो

आपलं आणी परकं...

यशाचे धनी सगळेच

अपयश नेहमीच पोरकं...!

हातोहात...!

दररोज आयुष्य मला

काहीतरी शिकवीत असत...

थोडस देवून बरचस काढून घेतांना

हातोहात फसवत असत...!

उगाचच...!

जीवन आणी मरण, एकाच नाण्याच्या

दोन बाजू आहेत म्हणतात...

जगतांना मेल्याचा अन मेल्यावर

जगण्याचा उगाचच आव आणतात...!

मर्म...!

आपला स्वार्थ जपणे

इथल्या प्रत्येकाचा धर्म आहे...

मी - माझे - मला

एव्हढेच यांच्या जगण्याचे मर्म आहे...!

समर्पण...!

हुतात्म्यांची नावं रस्त्यांना देण्यात

न जाणो कोणती भावना आहे...

त्यांच्या रस्त्याने जातो म्हणणे

ही समर्पणाची शुद्ध संभावना आहे...!

घर...!

घर हे स्वप्नरंजन नव्हे

तर एक संकल्पना असते...

मांडली तर भातुकली,

विस्कटली तर वल्गना असते...!

अमावस्या...!?!

एकटेपणाची परिसीमा

त्या दिवशी घडली...

अमावस्या आली म्हणून

रात्र माझ्यासवे रडली...!

अनुनय...!?!

साथ हा शब्द

खरा मजेदार आहे...

मागितली तर अनुनय,

मिळाली तर बहार आहे...!