अनुबंध…!

सदिच्छेच्या फुलांना

दुराव्याचा गंध

भेटीने होतात

दृढ अनुबंध…!

सन्मित्र संजयला वाढदिवसाच्या मन:पूर्वक शुभेच्छा!

नवपर्व...!

उधाणल्या सागराच्या

निवल्या बऱ्याच लाटा

खुणावती नवी क्षितिजे

मोहविती नव्या वाटा…

आशेला पूर नवा

स्वप्नांना रंग नवे

आभाळ गाठण्यास

पंखांना बळ हवे…

हर्ष खेद सांभाळीत

सरले आणि एक वर्ष

उन्नतीच्या जोडीने होवो

जगण्याला जाणीवेचा स्पर्श…

नवपर्वाच्या हार्दिक शुभेच्छा…!

आयुष्य…!

थेंब थेंब जगणे

कवडसे जमवणे

सुखाला भ्रमाच्या

धुंदीत रमवणे…

कण कण मरणे

क्षण क्षण झुरणे

भंगूनही नित्य

पाऱ्यासम उरणे…

श्वासांचे कोंडणे

शब्दांनी भांडणे

अनावर होता

उसासून सांडणे…

गणिताचे फसणे

हिशोबाचे चुकणे

प्रयत्नांना वेडावत

नशिबाचे हुकणे…

स्वप्नांचे सजणे

उन्मेशांचे फुलणे

काळाने कूस बदलता

नवे बीज रुजणे…!

अश्मयुग...!

अजूनही त्यांच्या जाणीवेत

असूया अन तेढ फार आहे

आधुनिक जगण्यालाही

अश्मयुगाची धार आहे…!

फकीर...!

अनुनयाचा मोह नाही

अवहेलनेची खंत नाही

कळपातला होऊन चरण्या

वेड्या फकिरा उसंत नाही…!

रौरव...!

 

सान्निध्याची सक्ती अन

तादात्म्याचा अभाव

याहून काय वेगळा असेल

रौरव-नरकाचा प्रभाव…!

'मी'...!

 

थोडासा मी जगलो

किंचितसा मी तगलो 

मी कदाचित जिंकलो

पण 'मी' कितीसा उरलो…?

वीण…!

 

सुखाचा धागा,

वेदनेची वीण…

भरजरी वस्त्र आणि

वागवण्याचा शीण…!

रोजच..!

 

व्यवहाराच्या भाळी

रोजच सुवर्णतुला

'मना' रिझवण्यासाठी

गतस्मृतींचा झुला…!

उन्मुक्त...!

 

दुखणे जुनेच तरी

 

कळ रोज नित्य नवी…

 

वाहण्या भार जगण्याचा

 

उमेद उन्मुक्तच हवी…!