स्त्रीत्व...!

पुरुषाच्या नशिबी नाही 

कोमल कणखर स्त्रीत्व 

जग उद्धारण्या समर्थ 

समर्पित स्वयंभू स्वत्व…!

जागतिक महिला दिनाच्या सर्व पुरुषांना शुभेच्छा…!

रुढार्थ...!

रंगात रंगण्याचा उत्सव

होळीत अनिष्टाचे दहन

पोरखेळ खोडकर वाटता

जाणावा रुढार्थ गहन…!

तादात्म्य...!

गतकाळाच्या स्मृती अन

आकांक्षांची स्वप्ने नवी…

जगण्याचा बहर उमलण्या

तादात्म्याची सिध्दी हवी…!

अन्वयार्थ…!

स्वप्नीं चालतां लवडसवडीं । जो अडखळूनि पडला आडीं ।

तो जागा हो‌ऊनि आपणातें काढी । तैशी वृक्षा वोढी साधनीं ॥

पीक आलिया घुमरी । ते शेतीं कोण नांगर धरी ।

गजान्तलक्ष्मी आलिया घरीं । भीक दारोदारीं कोण मागे ॥

हातीं लागलिया निधान । नयनीं कोण घाली अंजन ।

साधलिया निजात्मज्ञान । वृथा साधन कोण सोशी ॥

- संत एकनाथ महाराज (एकनाथी भागवत)

अक्षरयज्ञ...!

ज्ञानपिठातून उमलते

जेथे जनस्थानाची कळी

लोपणे कसे असेल या

अमृतवाणीच्या भाळी…

अभिजात तशी चिरंतनही

कविवर्यांची ही भाषा

दुमदुमून सोडते जणू

सप्तपाताळ दाही दिशा

द.मा. - साधूंचा गौरव येथे

हेलाविते मुजावरांची मुक्ती

दिवसेंदिवस दृढ आणिक

नि:स्सिम आमुची भक्ती…!

'मराठी दिन' साजरा करण्यापेक्षा 'मराठी आयुष्ये' जगू

या कल्पनेने सर्व साहित्यधुरीणांना समर्पित…!

आई पपा...!

तुमच्या सहजीवनातून अनेक लोकांना 

खूप प्रेरणा मिळू शकते हे अगदीच खरं
आता कुणी, कसा, काय बोध घ्यावा हे 

ज्याच्या त्याच्या प्रज्ञेवर सोडलेलच बरं…!

यशस्वी सहजीवनाच्या मन:पूर्वक शुभेच्छा अन सुवर्ण महोत्सव साजरा करता यावा ही अपेक्षा…!

तूट…!

'नाईट लाइफ' अन 'अधिग्रहण'

'प्रधानसेवका' चा कोटींचा सूट

विकासघोषात घुसमटतो विचार

कशी भरून काढावी विवेकी तूट…!

व्हँलेन्टाइन डे...!

'काळ' बदलता 'वेळ' बदलली

कुणी जाइना गुलाबाच्या वाटे

यंदा व्हँलेन्टाइनचा साज नवा

कमळाला घड्याळाचे काटे...!

'आप'बीती...!

महायोध्यांची सफाई

नीतिमूल्ये जाता सती

सत्तांध डावपेचांची

चिंतनीय 'आप'बीती…!

उदाहरणार्थ...!

खान्देशी सांगवीकरास ज्ञानपीठ वैगरे

सन्मानच म्हणायचा अन उदाहरणार्थ

'जगण्याची समृध्द अडगळ' वंदनीय,

बिढार मार्गस्थ अन कोसला कृतार्थ…! 

    

मराठी साहित्यास एक वेगळे परिमाण देणाऱ्या भालचंद्र नेमाडे सरांस

ज्ञानपीठ पुरस्कार जाहीर झाल्याबद्दल सहर्ष अभिनंदन…!