भूत...!

प्रवास इथला

काळाचा दूत

आजचा आज

उद्याचे भूत...!

शूल...!

एकेका शब्दातून

व्यक्त एकेक शूल

हळव्याला प्रचीती

भटक्याला रानभूल...!

मीमांसा...!

 

नपुंसकाचे शील

दुर्बलाची अहिंसा

बकाचे ध्यान अन

वांझोटी मीमांसा...!

आत्मभान...!

दुष्टचक्राच्या वावटळीत

उरावे कसे आत्मभान

'मस्त चाललय आमचं...'

तारण ठेवलाय स्वाभिमान...!

बेट...!

क्रुसाचा काटेरी वसा

वेदनेला भिडणे थेट

जादुई पोतडीत आज

सापडावे करुणेचे बेट...!

दुखवटा...!

कळपातला नव्हतोच कधी

ना चढविला कधी मुखवटा

त्यांच्या स्वयंभू क्षुद्रतेचा

मला का उसना दुखवटा...!

जंतू...!

बेनाम चिंता

अक्षय किंतु

मनी मानसी

षडरिपूंचे जंतू...!

संदर्भ...?

नि:संदर्भलाही

संदर्भ नवे...

कसे झुलावे

क्षणासवे...?

शून्य...!

तुझ्याशिवाय आयुष्य

एक पोकळ शून्य आहे

तुझ्याशिवाय माझ्यासाठी

प्रत्येकजण अन्य आहे...!

स्वगत...!

उदासीनतेची परिसीमा

अन एकलेपणाची हद्द

संवाद हरवला कधीचाच

आता तर स्वगतही रद्द...!