[Un]Common-man...!

जन्मजात अनाथ माणसां

करून नि:शब्द अन पोरके

निघून गेला मार्मिक हुंकार

आता न व्यंगचित्र बोलके…!

मनस्वी अर्कचित्रकार  अन लेखक आर के लक्ष्मण यांना सद्गदित भावांजली…!

प्रजासत्ताक...!

 

स्वातंत्र्य जन्मसिद्ध हक्क

लोकशाहीचे ठेवता भान… 

प्रजासत्ताक चिरायू होण्या 

संविधानाचा ठेवू या मान …!

वाव…!

 

सूर्य भरत नाही जोवर टोल

अन चंद्र करत नाही उठाव

माणूस कितीही ढळला तरी

आहे अजून जगण्यास वाव…!

रिता...!

 

रोज नव्याशा ओंडक्याने

सजवावी आपलीच चिता...

काठोकाठ भरतो प्याला

तरी उरतो तेवढाच रिता...!

ध्यान...!

 

 

देवाशी हितगूज करण्यास काल गेलो 

मंदिरात पूर्व संस्कारांच्या सक्तीतून 

बाहेर काढलेले जोडे पळवीणाऱ्याची 

भूक मोठी असावी माझ्या भक्तीहून…!

ओळख...!

 

त्यांच्या खेळात रमण्या

सक्ती ओळख घालण्याची

नाही मुभा जीवास येथे

वाट आपली चालण्याची…!

सचोटी...!

विषमतेची परिसीमा इथे

अन दांभिकता पराकोटीची

नीतीमूल्यांची आहुती घेते

सत्वपरीक्षा रोज सचोटीची…!

वर्ष...!

हर्ष-खेद पोटी घेत

आणि एक वर्ष सरले…

हिशोब मांडावा म्हणतो

जगणे कितीसे उरले…!

कसोटी...!

वासनांध जगण्यास या

शाप दग्ध जाणिवांचा

मूल्यांची कसोटी रोज

ताप अतृप्त उणीवांचा…!

माप-काटे...!

 

तुझेमाझे खरेखोटे जमाखर्च

जगण्यावर असण्याचा घाव

सगळे माप-काटे गुंडाळून

कधी मिळावा श्वासास वाव …!