खेळ...!

दुस-याचा विचार करायला

इथे कुणाला वेळ आहे...

म्हणायला माणसाचं जग

प्रत्यक्षात उंदरामांजराचा खेळ आहे...!

बंधन...!

बंधन नव्हे कच्च्या धाग्याचे...

वचन नव्हे खोट्या त्यागाचे...

सदोदित जाणून एकमेका...

व्रत हे जीव पाखडण्याचे...!

आठवणी...!

डोळ्यात आसू, ओठांवर हसू

आणतात आठवणी...

गर्दीत एकट, एकलेपणात गर्दी

करतात आठवणी...!

आव...!

फांदीवर बसून एकला कावळा

करतोय केव्हाचा कावकाव

त्याचाही भरून आलाय गळा

तरी गाण्याचा आणतोय आव...!

क्षण...!

काही क्षण फक्त

दोघांचेच असतात

धरून ठेवता येत नाही

म्हणून विसरायचे नसतात...!

गूढ...!

निष्पर्ण वृक्षावर भर दुपारी

एक घरट दोन पक्षी...

आयुष्याच्या भक्क उजेडात

नियतीची गूढ नक्षी...!

मैत्र...!

बेगडी नात्यांच्या जंजाळात

जीव कधीचाच दमतो...

माउली म्हणती 'मैत्र जीवाचे'

कृष्ण-सखा-सुदाम्यासह रमतो...!

पिंड...!

स्वार्थासाठी लाचारी  की

स्वत्वासाठी  नुकसान स्वीकारावं...

आपापल्या पिंडानुसार

ज्याच त्याने ठरवावं...!

गूढ...?

एकटाच पाहून घरात मला

चिमणा चिमणीला म्हणाला...

एकलेपणाचे गूढ याचे

विचारावे ग कुणाला...?

प्रतिमा...!

प्रतिमेचा शोध माझा

अलीकडे का फसतो...

आरसा मला बघून

अनोळखीस हसतो...!