‘सामाजिक प्रश्नांसाठी
संवेदनशीलतेचे पाझर खूप लोकांना फुटतात पण आपलं प्रोफेशनल डोकं मात्र नॉर्मल
करियरमध्ये पैसा कमविण्यासाठीच वापरायचं असा डायव्हर्जन्स खूप आहे...’
आजच्या नवमूल्यव्यवस्थेतील तत्वहीन, अंधानुकरणी, चंगळवादी आणि बाजारशरण मानसिकतेला सरळ सरळ 'दांभिक' न म्हणता, त्या जीवांच्या अगतिक अवस्थेचे आणि परस्परजीवी समाजव्यवस्थेचे इतके सहानुभूतीपूर्वक, प्रत्ययकारी आणि यथार्थ वर्णन, शाळेत न जाताही, (किंवा म्हणूनच?) इतक्या समर्पक शब्दात करायला, 'I and Rani are blessed with lack of personal ambition…’ म्हणणारे, मानणारे आणि जगणारे डॉ. अभय बंग आणि डॉ. राणी बंग यांचेच पालकत्व लाभावे लागते...
आयुष्यात यशस्वी होण्यासाठी, सुखासीन जगण्यासाठी आणि नियोजनबद्ध पद्धतीने परिश्रमपूर्वक घडविलेले सोशल स्टेट्स जपण्यासाठी आपण निवडलेल्या आपापल्या व्यावसायिक बांधिलकीत [Professional Commitment] अहोरात्र व्यस्त असाल मान्य, पण कधीतरी थोडा वेळ काढून आनंदवन, हेमलकसा आणि गडचिरोली इथे जे वेगळ्याच ‘विकास’ ‘प्रकाश’ आणि ‘निर्माणा’चे काम चालते त्याचा अमृतानुभव घेऊन थोडीशी सामाजिक बांधिलकी देखील जपता आली तर पहा... जाणीवा समृद्ध होऊन प्रगल्भ जगण्याची अगदी अनुभूती नाही तरी प्रचीती यायला प्रत्यवाय नसावा!
आ नो भद्रा: क्रतवो यन्तु विश्वत: |
