नवी प्रभा, नवी सांज
नवा सूर्य, नवी हवा;
नवा स्पर्श, नवा हर्ष
उगवता दिवस नवा!
नवउन्मेषाची नव्हाळी,
फळाफुलांना गंध नवा;
नवी स्वप्ने, नव्या दिशा,
नवतेला नवसाज हवा!
रेशीम वस्त्र, कडुनिंब लेणं,
तांब्याला साखरेचा गोडवा;
गुढी नटून जाता गगनावरी,
नववर्ष आले सांगे पाडवा!
हे मावळतीला आलेल्या संवत्सरा, तू आम्हाला तुझ्या छत्र छायेत जोपासले त्यासाठी आम्ही तुझे ऋणी आहोत. तुझ्या वाटचालीत तू आम्हाला चांगले शिकवलेस, सुखाचे दिवस दाखवलेस हा तुझा प्रसाद म्हणून आम्ही जपू. तू आम्हाला जे कांही दुःखाचे दिवस दाखवलेस त्यातून आम्हाला बरेच शिकायला मिळाले. हे सर्व आम्ही कर्म भोग म्हणून स्वीकारतो.
येणाऱ्या नवीन संवत्सरात आम्हाला सुकर्म अन् सत्चारित्र्याचं जीवन लाभू दे. येऊ घातलेल्या नवीन संवत्सरात सकल विश्व आनंदी, शांत अन् समृद्ध होवू दे. उत्तम पर्जन्य, विपुल धान्य या सृष्टिला लाभू दे. विवेकबुद्धी आणि प्रेमभाव वाढून, वैरभाव व युद्धजन्य परिस्थीती दूर कर. सकल जीव सृष्टीमध्ये सहवेदना वाढीस लागून सामंजस्य, समायोजन व सख्यभाव वाढू दे.
हे मावळत्या संवत्सरा तुझा निरोप घेतांनाच नवीन येणाऱ्या संवत्सराच्या स्वागतासाठी आम्हाला सज्ज होण्याचा आशिर्वाद लाभू दे.
शुभम् भवतु ।
कोणत्याही टिप्पण्या नाहीत:
टिप्पणी पोस्ट करा