क्रांती वगैरे

‘एखादा भावलेला अनुभव, विचार किंवा अवस्था विरूपाच्या आधाराने काव्यरूप झालेली दिसली की त्या कवितेला मी विरूपिका म्हणतो’, अशी विरुपिकेची व्याख्या सांगून आणि ‘गद्यपद्यविवेक बाजूला ठेवून’ विंदांनी ज्या ‘रचना’ केल्या त्या म्हणजे विरूपिका!

विंदा जन्मशताब्दी महोत्सवाच्या उत्तरार्धातील उर्वरित पाच महिन्यांस उद्यापासून सुरवात होईल. विंदांच्या खोडकर तत्वचिंतकाच्या भाषेत सांगायचे तर... ‘सात गेले अन पाच राहिले...!’ या मुहूर्तावर विरूपिका मधली एक रचना आज आणि आणखी काही जेव्हा आणि जशा जमतील तशा...

छत्री शिवण्याचा उपक्रम
मी हाती घेतलेला
आणि तेवढ्यात
घनघोर पावसातून भिजत आलेले
तीन विद्रोही
माझ्यापुढे दत्त.

मी त्यांना स्पष्टपणे सांगितले,
क्रांती वगैरे कशालाच माझी ना नाही;
पण त्या आधी
माझी छत्री मला शिवावीच लागेल.