चैत्र-पहाट...!

 

चैत्र-पहाट उमलता

 

गुढी उभी आभाळी

 

लिंब लोणाचा शृंगार

 

धुंद आंब्याची नव्हाळी…!

सर्वसाक्षी...!

 

भोगण्याची वल्गना

वल्गनेचा विकार

विकारातून विनाश

तत्वभक्षी...

 

जगण्याची कल्पना

कल्पनेचा विचार

विचारातून साकार

सर्वसाक्षी...!

आरक्त...!

 

घातक संग

विकृतींचा

निस्संग रहाया

विरक्त व्हावे…

 

विखारी रंग

उत्कर्षाचा

विवेक डांबून

आरक्त न्हावे…!

भुईभार…!

 

जनांच्या संगे

 

मनाचिये भंगे

 

सोयीस्कर रंगे

 

सोपस्कार…

 

 

हितकर गर्दी

 

हरविले दर्दी

 

फुकाची वर्दी

 

भुईभार…!

देणगी...!

 

गेल्या दिसांच्या आठवणींना

 

हुरहूर विश्रब्ध जाणिवेची

 

विस्मृतीचा मिळो वर किंवा

 

देणगी मुरमाड नेणीवेची…!

कावा...!

 

विषादाने मेले नाही कुणी

 

असा त्यांचा दावा आहे…

 

जगण्याची ढोंगी व्याख्या

 

हा प्रच्छन्न कावा आहे…!

अनित्य...!

 

सोडवल्याने सुटतीलच

 

सारे प्रश्न असे नाही…

 

अनित्य आहेत प्रश्न तसे

 

उत्तरांनाही ठसे नाही…!

'स्मार्ट'…!

 

माणूस असो नसो

 

फोन 'स्मार्ट' हवा

 

हिशेबी आयुष्याला

 

रोज 'चार्ट' नवा…!